Ўзбекистонда Урбанизация қўмитаси ташкил этилди: қурилиш, уй-жой бозори ва ипотека сиёсатида янги босқич

Ўзбекистонда урбанизация жараёнларини тезлаштириш, уй-жой бозорини барқарор ривожлантириш ва ипотека сиёсатини янги даражага олиб чиқиш мақсадида Ўзбекистон Республикаси Урбанизация ва уй-жой бозорини барқарор ривожлантириш миллий қўмитаси ташкил этилди. Президент фармонига кўра, қўмитага тажрибали раҳбар Шерзод Давлатович Қудбиев раис этиб тайинланди.

Ушбу янгилик мамлакатнинг шаҳарсозлик сиёсатида муҳим бурилиш саналади ва янги қўмита урбанизация соҳасида бош ваколатли давлат органи сифатида фаолият юритади.

Янги ташкил этилган қўмита Ўзбекистонда шаҳарлар ривожи ва уй-жой бозоридаги давлат сиёсатини белгилашда марказий органга айланади. Унинг фаолияти қуйидаги йўналишларни қамраб олади:

Шаҳарлар кенгайиши, агломерацияларни ривожлантириш, замонавий шаҳар инфратузилмасини яратиш ва аҳоли учун қулай муҳитни шакллантиришда ягона сиёсати юритади.

Қурилиш ҳажмларини режалаштириш, давлат қўллаб-қувватлови механизмлари, уй-жой мажмуаларини барқарор ривожлантириш қўмита масъулиятига ўтади.

Эски уй-жой фондларини янгилаш ва хавфли биноларни замонавий уйлар билан алмаштириш бўйича дастурларни тезкор ва самарали амалга оширишни таъминлайди.

Массивлар жойлашуви, қурилиш мезонлари, урбанизация талаблари ва инфратузилма билан боғлиқ барча қарорлар қўмита билан келишилади.

Фармонга мувофиқ, Иқтисодиёт ва молия вазирлиги ҳузуридаги Кадастр агентлиги Урбанизация қўмитаси тизимига ўтказилди. Бу:

• ҳудудий ривожланиш,
• ер муносабатлари,
• кадастр маълумотлари шаффофлиги,
• уй-жой қурилиши учун ер ажратиш жараёнларини

бир марказда мувофиқлаштириш имконини беради.

Шу билан бирга, Кадастр агентлиги директори Фаррух Пўлатов Солиқ қўмитаси раиси этиб тайинланди.

Эндиликда қуйидаги муҳим норматив-ҳуқуқий ҳужжатлар фақат Урбанизация қўмитаси билан келишилган ҳолда қабул қилинади:

• уй-жойлар қурилишига давлат қўллаб-қувватлови чоралари;
• Тошкент ва Нукус шаҳарлари, вилоят марказлари ва агломерацияларда турар-жой ҳамда нотурар-жой мажмуаларини қуриш лойиҳалари;
• “Янги Ўзбекистон” массивлари бўйича йиллик қурилиш режалари;
• ривожланиш ҳудудларини белгилаш ва комплекс қурилиш дастурлари.

Бу тизим уй-жой бозорида барқарорлик, шаффофлик ва узвийликни таъминлайди.

Қўмита қуйидаги стратегик вазифаларни устувор деб белгилаган:

Мамлакатнинг барча ҳудудларида аҳоли сони ўсиши, ички миграция ва агломерацияларнинг ривожланишига мос сиёсат юритиш.

Қурилиш ҳажмларини ошириш, ипотека бозорини ривожлантириш, аҳолининг уй-жойга эгалик қилиш имкониятларини кенгайтириш.

Чиройсиз ва эски бино фонидаги муаммоларни ҳал қилиш, хавфли уйларни замонавий кўп қаватли бинолар билан алмаштириш.

Янги шаҳарларда инфратузилма, таълим, соғлиқни сақлаш ва транспорт тизими билан уйғун уй-жой массивларини қуриш.

• Урбанизация қўмитасининг штат бирликлари сони 50 та этиб белгиланган.
• Лойиҳавий бошқарув тамойили асосида иш юритилади.
• Маҳаллий ва хорижий мутахассислар, олимлар ва экспертлар билан тўғридан-тўғри шартномалар асосида ҳамкорлик қилиш имконияти берилади.
• Қўмита Тошкент шаҳридаги Зулфияхоним кўчаси, 1а манзилида жойлаштирилади.

Барча дастурларни бир марказдан бошқариш қурилиш соҳасида барқарорлик ва тезкорликни оширади.

Ипотека, қурилиш ва кадстр маълумотлари бир тизимда юритилиб, қарорлар қабул қилиш тезлашады.

Агломерацияларнинг ривожланиши, янги массивлар қурилиши ва шаҳарсозлик сиёсати мутлақо янги босқичга кўтарилади.

Ўзбекистонда Урбанизация қўмитасининг ташкил этилиши — уй-жой бозори, қурилиш ва шаҳарсозлик соҳасидаги ислоҳотларнинг логик давоми. Қўмита барча ривожланиш дастурларини ягона марказ орқали мувофиқлаштириб, мамлакатнинг урбанизация сиёсатини янги даражага кўтаради. Бу аҳоли учун кўпроқ уй-жой имкониятлари, ҳудудлар ривожи ва иқтисодий барқарорликка хизмат қилади.