Рақобат қўмитаси аралашуви билан қурилиш шартномаси бўйича фуқароларнинг тўловлари тўлиқ қайтарилди

Сўнгги йилларда Ўзбекистонда қурилиш соҳасида шартнома мажбуриятларининг бажарилмаслиги билан боғлиқ мурожаатлар сони ортиб бормоқда. Айниқса, қурилиш муддатларининг кечиктирилиши, объектларнинг топширилмаслиги ва шартнома бекор қилинган тақдирда тўланган маблағларнинг қайтарилмаслиги фуқароларнинг асосий муаммолари қаторида қолмоқда.

Шундай ҳолатлардан бири яқинда Рақобат қўмитасининг аралашуви билан қонун доирасида ҳал этилди.

Рақобат қўмитасига фуқаролар П.М. ва М.Ф. томонидан йўлланган мурожаатда қурилиш соҳасида тез-тез учраётган муаммо — шартномаларнинг бажарилмаслиги масаласи кўтарилган.

Мурожаатда қайд этилишича, фуқаролар 2023 йилда “GRAND COMFORT BUILDING” МЧЖ билан “RABAD” савдо маркази қурилишида иштирок этиш мақсадида шартнома имзолаган. Шартнома шартларига мувофиқ, мазкур савдо маркази 2025 йил февраль ойида фойдаланишга топширилиши лозим эди.

Бироқ амалда қурилиш ишлари тўхтаб қолгани, белгиланган муддатда объект топширилмаслиги аниқ бўлган.

Фуқаролар 2025 йил август ойида шартномани қонун талаблари асосида бекор қилиш мақсадида застройчикка расмий ариза билан мурожаат қилган. Шунга қарамасдан, узоқ вақт давомида тўланган маблағлар қайтариб берилмаган.

Бу ҳолат фуқароларнинг ҳақли норозилигига сабаб бўлиб, ўз ҳуқуқларини ҳимоя қилиш ҳамда масалани қонуний тартибда ҳал этиш учун улар Рақобат қўмитасига мурожаат қилишган.

Маълумот ўрнида айтиш жоизки, “Истеъмолчиларнинг ҳуқуқларини ҳимоя қилиш тўғрисида”ги Қонуннинг 19-моддасига мувофиқ, ижрочи ишларни (хизматларни) шартномада ёки белгиланган қоидаларда кўрсатилган муддатда, ҳажмда ва сифатда бажариши шарт.

Агар ушбу мажбуриятлар бажарилмаса, истеъмолчи шартномани бекор қилиш ва тўланган маблағларни тўлиқ қайтариб олиш ҳуқуқига эга.

Фуқароларнинг мурожаати Рақобат қўмитасининг Тошкент вилояти ҳудудий бошқармаси томонидан атрофлича ўрганиб чиқилди. Ўрганиш жараёнида застройчик томонидан шартнома шартлари бузилгани аниқланди.

Натижада, “GRAND COMFORT BUILDING” МЧЖ томонидан:

• ҳар бир истеъмолчига 133 602 000 сўмдан,
• жами 267 204 000 сўм маблағ тўлиқ қайтариб берилиши таъминланди.

Шу тариқа, фуқароларнинг бузилган ҳуқуқлари тикланди ва масала қонун доирасида ҳал этилди.

Рақобат қўмитаси маълум қилишича, қурилиш соҳасида истеъмолчилар ҳуқуқларини ҳимоя қилиш бўйича ишлар изчил давом эттирилмоқда. Хусусан:

• шартнома шартларининг бажарилиши устидан назорат;
• застройчиклар томонидан қонунбузарликларнинг олдини олиш;
• фуқароларнинг ҳуқуқий онгини ошириш;
• бундай ҳолатларнинг келгусида такрорланмаслигини таъминлашга қаратилган чоралар амалга оширилмоқда.

Ушбу ҳолат фуқаролар учун муҳим сигнал бўлиб хизмат қилади: агар қурилиш соҳасида шартнома шартлари бузилса ёки тўланган маблағлар асоссиз равишда қайтарилмаса, ваколатли органларга мурожаат қилиш орқали ўз ҳуқуқларини қонун йўли билан ҳимоя қилиш мумкин.

Рақобат қўмитаси эса бундай масалаларда фуқароларнинг манфаатларини ҳимоя қилишни изчил давом эттирмоқда.