Ўзбекистонда муддатли тўлов қоидалари ўзгартирилади: квартира сотиб олиш билан нима бўлади

2027-йил 1-январьдан бошлаб Ўзбекистонда муддатли тўлов хизматлари операторлари учун янги қоидалар амал қила бошлайди. Бундай хизматларни воситачи сифатида кўрсатувчи компаниялар Марказий банкнинг махсус реестрига киришлари шарт.

Янги қоидалар муддатли тўлов операторлари учун чекловлар ўрнатади. Бундай хизмат орқали харид қилиш қиймати 250 БҲМ — 110 млн сўмдан ошмаслиги керак, муддатли тўловнинг максимал муддати эса 12 ойни ташкил этади.

Аммо бу квартираларни муддатли тўлов асосида сотиб олиш мумкин эмас дегани эмас.

Янги қоидалар фақат муддатли тўлов операторларига — сотувчига хариднинг тўлиқ қийматини тўлаб, кейин харидордан қисмларга бўлиб тўловларни қабул қиладиган воситачи компанияларга тегишли.

Муддатли тўлов операторлари мижозларни рақамли идентификация қилишлари ва текширишлари шарт бўлади. Шунингдек, барча шартномалар ва уларнинг ижроси ҳақидаги маълумотлар кредит бюроларига узатилиши керак.

Қарор қабул қилишда компания мижознинг қарз юкини ҳисобга олади. Максимал кўрсаткични Марказий банк белгилайди.

Бу, бир шахсда бир вақтнинг ўзида бир нечта муддатли тўлов шартномаси расмийлаштирилган ва кредит ташкилотлари бу ҳақда тўлиқ маълумотга эга бўлмаган вазият хавфини камайтиришга ёрдам бериши керак.

Алоҳида талаблар маҳсулот-истеъмол кредитлари билан расман ишловчи компанияларга ҳам амал қилади. Агар уларнинг товар, иш ва хизматларни сотишдан олинган чораклик айланмаси 500 млн сўмдан ошса ва сотувларнинг камида ярми муддатли тўловга тўғри келса, у ҳам Марказий банкда рўйхатдан ўтиши, реестрга кириши ва муддатли тўлов операторлари билан бир хил қоидаларга риоя қилиши керак бўлади.

Янги қоидалар муддатли тўлов бозорини харидорлар учун шаффофроқ қилиш ва аҳолининг ортиқча қарз юкини чеклашга қаратилган.