Ўзбекистонда маданият соҳаси вакилларига ипотека учун субсидиялар берилади

Ўзбекистонда маданият, санъат ва адабиёт соҳаси мутахассисларига ипотека субсидияларини ажратиш тартиби тасдиқланди. Мазкур ёрдам ипотека кредити ҳисобидан янги қурилган кўп қаватли уйлардан хонадон сотиб олиш учун мўлжалланган.

Белгиланган талабларга жавоб берадиган мутахассислар субсидия олишлари мумкин:

• Иш стажи — маданият, санъат ёки адабиёт соҳасида камида уч йил
• Уй-жойнинг йўқлиги — ариза берувчи ва унинг турмуш ўртоғининг номида сўнгги икки йил давомида Ўзбекистон ҳудудида мулк ҳуқуқи асосида турар жой бўлмаслиги лозим
• Лицензия — сўнгги уч йил давомида тегишли соҳадаги фаолият учун лицензияга эга бўлиши шарт
• Даромад — оиланинг жами даромади белгиланган мезонларга мос келиши зарур.

Субсидия ариза берувчининг асосий иш жойи жойлашган ҳудуддаги бирламчи бозордан квартира сотиб олиш учун ажратилади. Уй-жой Иқтисодиёт ва молия вазирлиги томонидан қайта молиялаштириладиган ипотека кредити орқали сотиб олинади.

Аризани Давлат хизматлари марказлари ёки Ягона интерактив давлат хизматлари портали  — my.gov.uz орқали юбориш мумкин. Талабларга мувофиқлик ахборот тизимлари орқали автоматик тарзда текширилади.

Субсидия бир оилага фақат бир марта берилади. Ариза маъқуллангач, талабгор белгиланган тартибда қурувчи компания билан шартнома тузиши лозим. Агар дастлабки бадал учун ажратилган маблағ ўтказиб берилганидан сўнг 30 кун ичида ишлатилмаса, банк уни бюджетга қайтаради.

Аввалроқ эълон қилинган мақоламизда Ўзбекистонда кимлар ипотека субсидиясини олиши мумкинлиги ва унга қандай ариза топшириш ҳақида маълумот берган эдик.