Тошкентдаги лифтларда 37 мингдан ортиқ носозлик аниқланди

Тошкент шаҳридаги кўп қаватли уйларда жойлашган лифт ускуналарида 37 103 та техник носозлик қайд этилди. Бу ҳақда Саноат, радиация ва ядро хавфсизлиги қўмитаси томонидан Миллий матбуот марказида ўтказилган анжуманда маълум қилинди.

Анжуман давомида қўмита раҳбарияти пойтахтда саноат хавфсизлигини таъминлаш бўйича амалга оширилаётган ишлар ҳақида маълумот берди.

Қўмита ва унинг Тошкент шаҳар ҳудудий бошқармаси томонидан 2025 йил бошидан буён:

• 121 та назорат тадбири,
• 10 381 та профилактика тадбири,
• 2 755 нафар ходимнинг билим синовлари ўтказилган.

Текширув натижасида 1 145 та қонунбузилиш ҳолати аниқланиб, 135 нафар шахсга маъмурий жазо чоралари қўлланди.

Жорий йилнинг 8 сентябри куни “Омега Агро Строй” МЧЖга тегишли кран техник талабларга риоя этилмаган ҳолда ўрнатилиши натижасида қулаб тушган. Оқибатда бир киши ҳалок бўлган, икки нафар ишчи оғир жароҳат олган. Текширувдан сўнг қўмита кранлардан хавфсиз фойдаланиш бўйича қатор чоралар кўрди. Бугунги кунда пойтахтдаги 74 та кран қўмита рухсатномаси билан фаолият юритмоқда.

Назорат тадбирлари доирасида 205 та ёқилғи қуйиш шохобчаси ҳам текширилди. Улардан:

• 41 таси хавфли ишлаб чиқариш сифатида рўйхатга олинмаган,
• 78 таси экспертизадан ўтмаган,
• 21 та объект давлат реестрига киритилмаган,
• 129 тасида кадастр паспорти йўқлиги аниқланди.

Шунингдек, Тошкентдаги маданият ва истироҳат боғларидаги 263 та аттракцион ҳам ўрганилди. Текширувлар натижасида:

• 45 тасининг техник паспорти йўқ,
• 23 тасида масъул шахс тайинланмаган,
• 39 та аттракцион рухсатномасиз фаолият юритган.

Қоидабузарликлар аниқланган аттракционлар фаолияти вақтинчалик тўхтатилди.

Жамоатчилик назоратини кучайтириш мақсадида “attraksionnazorati” электрон платформаси ишга туширилди. У орқали ҳар бир аттракционнинг техник ҳолати, синов натижалари ва сертификатларига оид маълумотлар очиқ бўлади.

Шунингдек, лифтлар ҳолатини баҳолаш учун “Хавфсиз лифт” тизими жорий этилди. Ушбу база орқали шаҳардаги 9 147 та лифт текширилди ва уларда жами 37 103 та носозлик аниқланди.

2026 йил 1 июлдан кучга кирадиган техник регламентга мувофиқ, лифтларнинг ҳолати жамоатчилик учун аниқ белгиланади:

• 🟢 Яшил стикер – яроқли,
• 🔵 Мовий стикер – қисман носоз,
• 🟡 Сариқ стикер – носоз,
• 🔴 Қизил стикер – фойдаланиш учун хавфли.

Шу асосда, ҳозирча 6 844 та лифтда техник кўрикдан ўтмагани учун “Лифт техник кўрикдан ўтказилмаган” ёрлиқлари ёпиштирилди.

Тошкент шаҳридаги кўп қаватли уйлардаги лифтларнинг катта қисми таъмир ва янгиланишга муҳтож. Мутасадди ташкилотлар 2025 йил якунига қадар аниқланган барча носозликларни бартараф этишни режалаштирмоқда.

Саноат хавфсизлиги соҳасидаги бу ишлар шаҳар аҳолисини бахтсиз ҳодисалардан ҳимоя қилиш ва жамоатчиликни хабардор қилишни мақсад қилади.